أنت والحياة

 جربتو ترقعو حياتكم؟

كل مارقعتوها تكتشفو فتق جديد

ما بتتهنو بالترقيعة الا وتنشق من جهة جديدة

بتطلع عليها ككل.. بتلاقيها بطل الها شكل غير ترقيعات.. 

فقدت شكلها الأصلي. 

بتصفن، وبتقول : العلة فيني، ولا بالحياة؟ ولا شو القصة؟ !!

الصفنة بتطول شوي، لانو ماعم تفهم شو صاير.. وهي حياتك الي مرقت قدامك وانت عم تحاول تنقذ ما يمكن انقاذه..

فجأة بدون مقدمات، بضوي شي بعقلك وفيه الجواب..

هي الرقع الي خجلان منها هي انت من جوا.. 

هاد الجرح وهداك الوجع، والفشل الي حاسو.. 

هنن خلقو منك هاد الشخص الي انت عليه هلا، وعم تحاول تغطي حالك ارضاء لناس ولا شايفينك اصلا..

الشي الحقيقي الوحيد الي بشوفك كل يوم وبيوجعو وجعك، وفهمان عليك تماما، هو انت.. 

اطلع بالمراية كل يوم وحاكي حالك وقدرها وحبها، قلا انا بحبك كيف ماكنت، وطب طب عليها وقلا ولا يهمك..

لا تضحكوا من كلامي... 

حبو حالكم وقدروها وكتير كمان، ورح تشوفو حياتكم رح تنقلب، والرقع رح تتحول لتميز، ورح تتباهوا فيها وكأنها قطعة فنية من شغلكم..